សពជនរងគ្រោះជាពលករខ្មែរម្នាក់​ ដែលស្លាប់ដោយរញ្ជួយដីបាក់អគារសង្កត់នៅប្រទេសថៃ ត្រូវបានដឹកមកដល់លំនៅដ្ឋានជូនសាច់ញាតិ​ នៅស្រុកម៉ាឡៃហេីយ

បន្ទាយមានជ័យ៖ សាកសពជនរងគ្រោះជាពលករខ្មែរម្នាក់ដែលស្លាប់ដោយរញ្ជួយដីបាក់អគារសង្កត់នៅប្រទេសថៃ  ត្រូវបានរថយន្តសង្គ្រោះថៃដឹកដល់លំនៅដ្ឋានជូនសាច់ញាតិស្រុកម៉ាឡៃ  នៅម៉ោង​ ៦ល្ងាចថ្ងៃទី៣១ ខែមីនា ឆ្នាំ២០២៥នៅច្រកទ្វារអន្តរជាតិប៉ោយប៉ែត។

នៅពេលដែលទទួលសាកសពជនរងគ្រោះគេឃើញក្រុមការងារថ្នាក់ជាតិ​  ក្រសួងការងារ និងបណ្តុះបណ្តាលវិជ្ជជីវៈ​  និងអាជ្ញាធរខេត្ត​ ស្រុក  និងក្រុមគ្រួសារចាំទទួលនៅច្រកទ្វារអន្តរជាតិប៉ោយប៉ែត​  ដែលមានអគ្គកុងស៊ុលកម្ពុជាប្រចាំខេត្តស្រះកែវ។ លោក ស្វាយ ជា អភិបាលស្រុកម៉ាឡៃបានប្រាប់ឱ្យដឹងថា  ជនរងគ្រោះដែលស្លាប់មានឈ្មោះ មាស វ៉ាង ភេទប្រុសអាយុ​ ២៥ឆ្នាំ(មុខរបបកម្មករសំណង់) រស់នៅភូមិបល្ល័ង្គ ឃុំតាគង់  ស្រុកម៉ាឡៃ ខេត្តបន្ទាយមានជ័យ  ដែលស្លាប់ដោយរញ្ជួយដី អគារបាក់សង្កត់   កាលពីថ្ងៃទី២៨ ខែមីនា ឆ្នាំ២០២៥​ នៅបាងកក  ប្រទេសថៃ។ លោកបានបញ្ជាក់ថា  ក្រោយទទួលព័ត៌មានបានដឹងជនរងគ្រោះត្រូវបានស្លាប់​  ដោយអគារបាក់សង្កត់នៅពេលមានរញ្ជួយដីនៅប្រទេសថៃសាច់ញាតិ​  បានទទួលដំណឹងតាមរយៈសាច់ញាតិរួមការងារ  ជនរងគ្រោះបានស្លាប់ហើយក្រុមសង្គ្រោះបានរកឃើញសាកសពគ្រួសារជនរងគ្រោះពិតមានភាពតក់ស្លុត  ហើយអាជ្ញាធរស្រុកម៉ាឡៃបានចូលរួមរំលែកទុក្ខដល់គ្រួសារសព។ លោក ស្វាយ ជា អភិបាលស្រុកម៉ាឡៃ បានបញ្ជាក់ថា​  សាកសពជនរងគ្រោះត្រូវភាគីថៃតាមរយៈអគ្គកុងស៊ូលកម្ពុជា​  ត្រូវបញ្ជូនសាកសពជនរងគ្រោះ  មកតាមច្រកទ្វារអន្តរជាតិប៉ោយប៉ែត​  តាមរយៈរថយន្តសង្គ្រោះថៃ  ដឹកជញ្ជូនដល់លំនៅដ្ឋានដែលក្រុមការងារថ្នាក់ជាតិ និងខេត្ត/ស្រុក និងសាច់ញាតិបានទទួលសាកសព  និងអរគុណចំពោះភាគីថៃ   ដែលបានយកចិត្តទុកដាក់​ និងដឹកជញ្ជូនសាកសពដល់លំនៅដ្ឋានស្រុកម៉ាឡៃ​  ខេត្តបន្ទាយមានជ័យ ដើម្បីប្រគល់ជូនសាច់ញាតិទទួលធ្វើបុណ្យតាមប្រពៃណី៕ ផ្សាយដោយ អង្គភាព គេហទំព័រ ប្រម៉ាញ់ជាយដែន tv  new