(ខេត្តស្វាយរៀង)៖ រន្ធត់ទាំងព្រឹកព្រលឹម ខណះដែលស្ត្រី កម្មការិនីរោងចក្រម្នាក់ រត់ឆ្លងថ្នល់ត្រូវរថយន្ត ដឹកកម្មករកម្មការិនី រោងចក្របុកបណ្តាល អោយស្លាប់ភ្លាមៗ នៅនិងកន្លែងកើតហេតុ។
ករណីគ្រោះថ្នាក់ ចរាចរណ៍នេះបាន កើតឡើងកាលពី វេលាម៉ោង៥នឹង ៤៥នាទីព្រឹកថ្ងៃទី២១ ខែមេសាឆ្នាំ.២០២០នេះ នៅលើផ្លូវជាតិលេខ៣១៤D ស្ថិតនៅចំណុច ភូមិ ស្វាយអាណាត ឃុំ ញរ ស្រុកកំពង់រោទិ៍ ខេត្តស្វាយរៀង។
យោងតាមសមត្ថកិច្ច បានអោយដឹងថា នៅមុនពេលកើតហេតុ មានរថយន្តមួយគ្រឿង ម៉ាក ហ៊ីយ៉ាន់ដាយ ពណ៌ ទឹកប្រាក់ ពាក់ស្លាកលេខ សៀមរាម3.A0439 ធ្វើដំណើរពីត្បូងទៅ ជើងបើកបរដោយ បុរសម្នាក់មានឈ្មោះ ឆូយ ភីរុន ភេទប្រុស អាយុ ៤២ឆ្នាំ រស់នៅភូមិ ជុបព្រីង ឃុំ ថ្មី ស្រុកកំពង់រោទិ៍ ខេត្តស្វាយរៀង មុខរបរបើករថយន្ត ដឹកកម្មករកម្មការិនី រោងចក្រ។
លុះមកដល់ចំណុច កើតហេតុខាងលើ មានស្ត្រីម្នាក់ឈ្មោះ ស្ងួន ស្រី ភេទស្រី អាយុ ៣៧ឆ្នាំ រស់នៅភូមិ ភ្នុំស្រូវ ឃុំ រាជមន្ទី ស្រុកកំពង់រោទិ៍ ខេត្តស្វាយរៀង មុខរបរកម្មកររោងចក្រ (ធ្វើការវេនយប់) បានចុះពីរ ថយន្ដដែលខ្លួន ជិះដើរចូលក្នុង ផ្សារកំពង់រោទិ៍ ដើម្បីទិញអីវ៉ាន់ លុះត្រឡប់ចេញ មកវិញបាំងរថយន្ត មួយគ្រឿងផ្សេងទៀត ក៏រត់ឆ្លងថ្នល់ពីទិស ខាងកើតទៅលិចនៅ ខាងផ្សារកំពង់រោទិ៍ សំដៅទៅរថយន្ត របស់ខ្លួនជិះក៏ ត្រូវរថយន្តខាងលើ បុកបណ្តាលអោយ ស្លាប់ភ្លាមៗនៅនិង កន្លែងកើតហេតុតែម្តង។
ក្រោយបង្កអោយ មានគ្រោះថ្នាក់រួច មកអ្នកបើកបររថយន្ត បានចុះពីរថយន្តរត់គេច ខ្លួនបាត់ស្រមោលតែម្តង រឺឯសាកសព ត្រូវបានសមត្ថកិច្ច ក្រោយពីបាន ពិនិត្យរួចរាល់ ហើយក៏បានប្រគល់ អោយក្រុមគ្រួសារយក ទៅធ្វើបុណ្យតាមប្រពៃណី។
ចំណែករថយន្តបង្ក ត្រូវបានសមត្ថកិច្ច យកមករក្សាទុក នៅប៉ុស្តិ៍នគរបាល ឃុំញរដើម្បីរង ចាំធ្វើការដោះស្រាយគ្នា តាមផ្លូវច្បាប់នៅ ពេលក្រោយ ៕
