(ប្រទេសថៃ)៖ ពលករខ្មែរប្រមាណ ជាង២០នាក់ ត្រូវកម្លាំងយោធា ការពារព្រំដែនថៃ ក្នុងអង្គភាពកង រយលេខ ១២០៦ ធ្វើការឃាត់ខ្លួនដើម្បី ឲ្យវិលត្រឡប់មក កាន់ស្រុកកំណើតវិញ ស្របពេលដែល មេរោគកូវីដ-១៩ កំពុងរាតត្បាតខ្លាំង។ ខណៈពលករខ្មែរទាំងនេះ លបឆ្លងដែនបម្រុង ចូលទៅរកការងារ ធ្វើនៅក្នុងប្រទេសថៃ ដោយគ្មានច្បាប់អនុញ្ញាត។
យោងយោងតាម របាយការណ៍ដែល សារព័ត៍មានទទួលបាន កាលពីរសៀលថ្ងៃទី១០ ខែមិថុនា ឆ្នាំ២០២០ បន្ទាប់ពីមានព័ត៌មានថា មានពលករខ្មែរ មួយក្រុមត្រៀមលប ឆ្លងដែនចូលទៅក្នុង ទឹកដីថៃ តាមចំណុច ឃុំផានសឹក ស្រុកអារញ្ញប្រាថេត ខេត្តស្រះកែវ រួចមក កម្លាំងវរៈការពារ ព្រំដែនលេខ១២ របស់ថៃ បានបញ្ជាទៅ កម្លាំងកងរយលេខ ១២០៦ ដើម្បីឲ្យចេញប្រតិបត្តិការ ពិនិត្យស្ថានភាព ជាក់ស្ដែង។
នៅពេលនោះដែរ កម្លាំងយោធាថៃ បានចេញល្បាត តាមបណ្ដោយ ផ្លូវសារីភិន ដែលជាផ្លូវស្ថិត នៅតាមបណ្តោយ ខ្សែបន្ទាប់ព្រំដែន ថៃ-កម្ពុជា និងមានចម្ងាយ ពីខ្សែបន្ទាត់ប្រមាណ ៥០០ម៉ែត្រ ក៏បានឃើញក្រុម ពលករខ្មែរមួយក្រុម បាននិងកំពុង នាំគ្នាលបដើរ ចេញពីព្រៃរបោះ បម្រុងឡើងទៅ លើផ្លូវធំ ទើបធ្វើការ ស្ទាក់ចាប់តែម្ដង ដើម្បីត្រួតពិនិត្យ។
នៅទីនោះគេសង្កេត ឃើញមានពលករខ្មែរ សរុបចំនួន២១នាក់ ក្នុងនោះស្រី៦នាក់ ហើយម្នាក់ៗគ្មាន ច្បាប់អនុញ្ញាតឡើយ។ ពួកគេបានសារភាពថា ពួកគេមានបំណង ចូលទៅធ្វើការនៅ កន្លែងដែលធ្លាប់ ធ្វើនាពេលកន្លងមក គឺនៅក្នុងទីក្រុងបាងកក និង ក្នុងខេត្តឈុនបុរី ព្រោះគ្មានការងារធ្វើ ទើបនាំគ្នាលបឆ្លងដែន ដោយមានគ្នាច្រើន ប៉ុន្តែត្រូវបានរត់បែក គ្នាអស់ខ្លះហើយ។ ទីបំផុត ពួកគេ ត្រូវបានកម្លាំងយោធាថៃ នាំខ្លួនយកទៅកាន់ អង្គភាពកងរយលេខ ១២០៦ ជាបណ្ដោះអាសន្នសិន ដើម្បីពិនិត្យទាំងសុខភាព ព្រោះបច្ចុប្បន្ន មានការរឹតបន្តឹង ដោយសារតែជំងឺកូវីដ-១៩ នៅមិនទាន់ ធូរស្រាលនៅឡើយ៕ ដោយលោក មួនរិទ្ធីយ៉ា
