(ខេត្តក្រចេះ)៖ ប្រភពស្និទ្ធនឹងមេឈ្មួញឈ្មោះ ធា បានឲ្យដឹងថា ឈ្មួញម្នាក់នេះ បានយកឈ្មោះ អ្នកធំក្នុងខេត្តក្រចេះ មកប្រើដើម្បីការពារ សកម្មភាពរបស់ខ្លួន ក្នុងការដឹកជញ្ជូនឈើពី ស្រុកសំបូរ និងស្រុកព្រែកប្រសព្វ ខេត្តក្រចេះ ចូលទៅស្រុកស្ទឹងត្រង់ ខេត្តកំពង់ចាម។
ឈ្មួញឈ្មោះ ធា តែងអួតអាងថាខ្លួន ជាប្អូនថ្លៃរបស់លោក វ៉ា ថន អភិបាលខេត្តក្រចេះ ហេតុនេះហើយ ទើបគ្មានមន្ត្រីជំនាញ ឬសមត្ថកិច្ចណាប៉ះ ពាល់ឈ្មួញម្នាក់នោះទេ។
ជាក់ស្ដែងកាលពីយប់ថ្ងៃទី៣០ ខែសីហា ឆ្នាំ២០២២ មេឈ្មួញឈ្មោះ ធា ដឹកជញ្ជូនពីស្រុកសំបូរ ឆ្លងកាត់ស្រុកព្រែកប្រសព្វ ខេត្តក្រចេះ ចូលទៅឃុំពាមកោះស្នា ស្រុកស្ទឹងត្រង់ ខេត្តកំពង់ចាម យ៉ាងរលូន គ្មានសមត្ថកិច្ច ណាហ៊ានបង្ក្រាបឡើយ។
ប្រភពពីប្រជាពលរដ្ឋនៅ ស្រុកសំបូរ និងស្រុកព្រែកប្រសព្វ ខេត្តក្រចេះ បានឲ្យដឹងថា ឈ្មួញឈ្មោះ ធា ដែលអាងមានខ្នង បង្អែករឹងមាំនៅតែធ្វើ សកម្មភាពដឹកជញ្ជូន ឈើចេញពីស្រុកទាំង២ នេះចូលទៅឃុំពាមកោះស្នា ស្រុកស្ទឹងត្រង់ ខេត្តកំពង់ចាម តាមអំពើចិត្ត។
បុគ្គលឈ្មោះ ធា ដឹកជញ្ជូនឈើចេញ ពីតំបន់ជម្រក សត្វព្រៃឡង់ ស្នាក់ការត្រពាំងសង្កែ ឆ្លងកាត់តាមឃុំកំពង់ចាម ឃុំវឌ្ឍនៈ ស្រុកសំបូរ និងស្រុកព្រែកប្រសព្វ ខេត្តក្រចេះ ចូលទៅដល់ស្រុកស្ទឹងត្រង់ ខេត្តកំពង់ចាម យ៉ាងសុខស្រួលបំផុត។
មន្ត្រីបរិស្ថាន មន្ត្រីរដ្ឋបាលព្រៃឈើ សមត្ថកិច្ចអាវុធហត្ថ និងសមត្ថកិច្ចនគរបាល ក្នុងស្រុកព្រែកប្រសព្វ ក៏ដូចជាស្រុកសំបូរ ខេត្តក្រចេះ មិនហ៊ានប៉ះពាល់ឈ្មួញឈ្មោះ ធា នោះទេ ព្រោះអីខ្លាចមានបញ្ហាដល់ខ្លួន។
មជ្ឈដ្ឋាននានាបាន អំពាវនាវឲ្យថ្នាក់ដឹក នាំគណៈកម្មការជាតិ ដើម្បីទប់ស្កាត់ និងបង្ក្រាបបទល្មើស ធនធានធម្មជាតិ ចាត់វិធានការបង្ក្រាប ឈ្មួញឈ្មោះ ធា ជាបន្ទាន់ ព្រោះឈ្មួញម្នាក់នេះ នៅតែធ្វើសម្មភាពដឹក ជញ្ជូនឈើខុសច្បាប់ យ៉ាងពេញបន្ទុក។
លោក សាន្ត ប៊ុនថាន មេបញ្ជាការកង រាជអាវុធហត្ថខេត្តក្រចេះ និងលោកឧត្តមសេនីយ៍ស្ន ងការ នគរបាលខេត្តក្រចេះ បានរក្សាភាពស្ងៀមស្ងាត់ បណ្ដោយឲ្យឈ្មួញឈ្មោះ ធា ធ្វើអ្វីៗតាមអំពើចិត្ត។
ប្រការនេះកំពុង ធ្វើឲ្យព្រៃឈើនៅ តំបន់ដែនជម្រកសត្វព្រៃឡង់ ស្រុកសំបូរ និងស្រុកព្រែកប្រសព្វ ខេត្តក្រចេះ ត្រូវប្រឈមនឹង សេចក្ដីវិនាស ព្រោះឈ្មួញឈ្មោះ ធា នៅតែអាចធ្វើ សកម្មភាពដឹកជញ្ជូន ឈើយ៉ាងពេញបន្ទុក។
