ខេត្តសៀមរាប៖ បុរសម្នាក់ បានស្លា.ប់ភ្លាម ដោយគាំងបេះដូង នៅវេលាម៉ោង ១៩ និង ៣០នាទី យប់ថ្ងៃសៅរ៍ ទី០៨ ខែតុលា ឆ្នាំ២០២២ ស្ថិតនៅក្នុងបរិវេណក្លឹបហាត់ប្រាណ យីហោ សាច់ដុំអង្គរ (ទល់មុខស្ពានអាងក្រពើ) ក្នុងក្រុមទី០៣ ភូមិវត្តដំណាក់ សង្កាត់សាសាលាកំរើក ក្រុង ខេត្តសៀមរាប។
សមត្ថកិច្ចនគរបាលមូលដ្ឋាន បានប្រាប់ឱ្យដឹង នៅរសៀលថ្ងៃទី៩ ខែតុលា ឆ្នាំ២០២២ នេះ ថា សពជនរងគ្រោះ ឈ្មោះ គង់ បូណារ័ត្ន ភេទប្រុស អាយុ ៥៣ឆ្នាំ ជនជាតិខ្មែរ មុខរបរ មន្រ្តីរាជការ (មន្ទីរអភិវឌ្ឍន៍ជនបទ) មានទីលំនៅភូមិជន្លង់ សង្កាត់សាលាកំរើក ក្រុងសៀមរាប ខេត្តសៀមរាប។
ប្រភពបានបញ្ជាក់ថា បើយោងតាមការស្តាប់បំភ្លឺរបស់ឈ្មោះ ឃួន គង់ ភេទស្រី អាយុ ៥២ឆ្នាំ ត្រូវជាប្រពន្ធ សពជនរងគ្រោះ បានប្រាប់សមត្ថកិច្ចថា ជនរងគ្រោះ ជាប្តី មានជម្ងឺប្រចាំកាយដូចជា ជំងឺក្រពះ និងជំងឺលើសឈាម ហើយបានប្រើប្រាស់ថ្នាំជាប្រចាំ។ ចំណែករង្វាស់ឈាមចន្លោះពី ១៤ ទៅ ១៥។ រៀងរាល់ពេល ដែលប្រឹងរត់ហាត់ប្រាណលើម៉ាស៊ីន ជនរងគ្រោះតែងតែមានអាការ: វិលមុខ ឈឺក្បាល ទាមទារឱ្យមានការសម្រាកបានច្រើន។
ប្រភពបានបន្ថែមថា ក្រោយពេលកើតហេតុ តាមរយ:ការពិនិត្យ និងការសន្និដ្ឋានពីនគរបាលជំនាញ និងគ្រូពេទ្យផ្នែកកោសល្យវិច័យ បានប្រាប់ថា សពស្លាប់ ដោយសារគាំងបេះដូង គឺរូបគាត់ និងក្រុមគ្រួសារឯកភាពទទួលស្គាល់តាមការសន្និដ្ឋានរបស់សមត្ថកិច្ច និងក្រុមគ្រូពេទ្យ នេះ ព្រមទាំងទទួលយកសពទៅធ្វើបុណ្យតាមប្រពៃណី។
ប្រភពបានឱ្យដឹងទៀតថា យោងតាមការបំភ្លឺសាក្សីឈ្មោះ ហាន់ ច័ន្ទវ៉ា ភេទស្រី អាយុ ២០ឆ្នាំ ជាបុគ្គលិកក្លឹបហាត់ប្រាណ បានប្រាប់សមត្ថកិច្ច ឱ្យដឹងថា នៅវេលាម៉ោងប្រហែល ១៩ និង០០នាទី យប់ថ្ងៃទី០៨ ខែតុលា ឆ្នាំ២០២២ មានភ្ញៀវម្នាក់ឈ្មោះ គង់ បូណារ័ត្ន ភេទប្រុស អាយុប្រហែល ៥៥ឆ្នាំ ដែលតែងតែមកហាត់ប្រាណ នៅក្លឹបនេះ ជាប្រចាំ បានមកហាត់ប្រាណរត់ដោយម៉ាស៊ីនរយៈពេល ២៥ នាទី ក្រោយពីរត់ដល់ចប់នាទី រូបគាត់ មានអាការៈទន់ខ្លួន ដោយដៃខាងស្តាំរបស់គាត់ ច្រត់ទៅលើដៃម៉ាស៊ីន ខ្លួនគាត់បានទន់ចុះក្រោម ទឹកមុខស្លេកស្លាំង បបូរមាត់ឡើងពណ៌ស្វាយ ហើយដួល ទៅលើឥដ្ឋការ៉ូ ក្បាលបែរទៅទិសខាងលិច ភ្លាមនោះ នាងខ្ញុំបានស្រែកហៅឱ្យភ្ញៀវដទៃទៀត ជួយសង្គ្រោះបឋម និងទាក់ទងហៅឡានពេទ្យ ប៉ុន្តែគាត់បានដាច់ខ្យល់ស្លាប់ មុនពេលឡានពេទ្យមកដល់។
សាក្សីម្នាក់ទៀត ឈ្មោះ ឈឿង សល់ ភេទប្រុស អាយុ ៤៦ ឆ្នាំ ជាភ្ញៀវ ដែលបានហាត់ប្រាណដូចគ្នា បានឱ្យដឹងថា នៅវេលាម៉ោងប្រហែល ១៩ និង ៣០នាទី យប់ថ្ងៃទី០៨ ខែតុលា ឆ្នាំ២០២២ ខណៈពេលដែលរូបខ្ញុំ កំពុងហាត់ប្រាណ ដោយធាក់កង់ មានភ្ញៀវម្នាក់ទៀត ឈ្មោះ គង បូណារ័ត្ន ភេទប្រុស អាយុប្រហែល ៥៥ឆ្នាំ ជាភ្ញៀវ ដែលតែងតែមកហាត់ប្រាណនៅក្លឹបនេះ ជាប្រចាំជាមួយខ្ញុំ ប៉ុន្តែគាត់បានហាត់ប្រាណដោយរត់ម៉ាស៊ីននៅពីមុខខ្ញុំ ពេលនោះ រូបគាត់មានអាការៈមិនស្រួលខ្លន ហើយបានដួលទៅលើឥដ្ឋការ៉ូ ភ្លាមនោះ រូបខ្ញុំបានជួយសង្គ្រោះបឋម ដោយធ្វើចលនាបេះដូង ហើយម្ចាស់ទីតាំង បានតេហៅរថយន្តសង្គ្រោះមក។ ប៉ុន្តែរូបគាត់បានដាច់ខ្យល់ស្លាប់មុនរថយន្តសង្គ្រោះមកដល់។
ប្រភពបញ្ជាក់បន្ថែមទៀតថា បើតាមការពិនិត្យសាកសព គឺផ្នែកក្បាល ផ្នែកដងខ្លួន និងផ្នែកអវ:យវ: នៅគ្រប់ត្រង់ ហើយកន្លែងនេះ ពុំមានស្លាកស្នាម រឺបាក់បែកដាច់រយាស់អ្វីនោះទេ។ ពោលគឺមិនពាក់ព័ន្ធនឹងបទល្មើសព្រហ្មទណ្ឌឡើយ។
ប្រភពបន្ថែមទៀតថា យោងតាមការបំភ្លឺពីសាក្សី និងក្រុមគ្រួសារសព និងការពិនិត្យលើដងខ្លួនសាកសពគ្រប់កន្លែងកើតហេតុ នឹងផ្អែកតាមលោកគ្រូពេទ្យកោសល្យវិច័យ បានបញ្ជាក់ថា ជនរងគ្រោះស្លាប់ដោយសារគាំងបេះដូង។ ក្រោយពីពិនិត្យសាកសពចប់ កម្លាំងជំនាញបានធ្វើកំណត់ហេតុ និងប្រគល់សពជូនក្រុមគ្រួសារ យកទៅធ្វើបុណ្យតាមប្រពៃណី៕
