ស្ទឹងត្រែង៖ តុលាការខេត្តស្ទឹងត្រែង នៅល្ងាចថ្ងៃទី២៣ ខែកក្កដា ឆ្នាំ២០២៤ បានចេញដីកាឃុំខ្លួនលោកវរសេនីយ៍ឯក( ចែម ផានិត) ប្រធានការិយាល័យប្រឆាំងបទល្មើសគ្រឿងញៀននៃស្នងការនគរបាលខេត្តស្ទឹងត្រែង រួមជាមួយកូនចៅរបស់លោកមួយចំនួនទៀត ទៅឃុំខ្លួននៅពន្ធនាគារកាំងមេម៉ាយ ។
លោក (ឈុំ ស៊ាងហាក់ )អ្នកនាំពាក្យសាលាដំបូងខេត្តស្ទឹងត្រែង បានមានប្រសាសន៍ ឲ្យអ្នកសារព័ត៌មានយើងដឹងនៅថ្ងៃទី២៤ ខែកក្កដា ឆ្នាំ២០២៤នេះដែរថា សំណុំរឿងរបស់នគរបាលខាងលើ ព្រះរាជអាជ្ញា និងចៅក្រមបានចោទប្រកាន់រួចរាល់ និងចេញដីកាឃុំខ្លួនរួចហើយដែរ ។
លោក (ឈុំ ស៊ាងហាក់) បន្តថា ចំណែកវត្ថុតាងរឹបអូសបានរួមមាន ប្រាក់ដុល្លារសុទ្ធចំនួន ៤ម៉ឺនដុល្លារ ប្រាក់ដុល្លារក្លែងក្លាយ(លុយសែន)ចំនួន១៧៨.១០០ដុល្លារ គ្រឿងញៀនចំនួន៣,១៧ក្រាម ទូរស័ព្ទដៃ៥គ្រឿង រថយន្តម៉ាកហាយឡិនឌ័រ១គ្រឿង និងអាវុធខ្លី១ដើម គ្រាប់៣៤គ្រាប់ ។
ទាក់ទិនករណីនគរបាលប្រឆាំងបទល្មើសគ្រឿងញៀន ហើយជាប់ពាក់ព័ន្ធគ្រឿងញៀនដូច្នេះនោះ លោកឧត្តមសេនីយ៍ទោ( អូន ស៊ីវុត្ថា )ស្នងការនគរបាលខេត្តស្ទឹងត្រែង ក៏បានថ្លែងប្រាប់សារព័ត៌មាន នៅថ្ងៃទី២៤ ខែកក្តដា២០២៤បន្ថែមផងដែរថា «ព្រោះនេះគ្រាន់តែជាចម្លើយសារភាពអាចោរលួចខ្សែភ្លើងដែលវាប្រើប្រាស់គ្រឿងញៀនទេ បើភស្តុតាងពិតមិនពិតអាហ្នឹងអត់ទាន់មានទេ អញ្ចឹងបើមានភស្តុតាងពិតអាហ្នឹងធ្វើតាមច្បាប់ចុះមានតែប៉ុនហ្នឹងទេ»។
សូមបញ្ជាក់ថា កាលពីរសៀលថ្ងៃទី២១ ខែកក្កដា ឆ្នាំ២០២៤ កម្លាំងកងរាជអាវុធហត្ថខេត្តស្ទឹងត្រែង ក្រោមបទបញ្ជាលោកឧត្តមសេនីយ៍ត្រី (សេង សុភាព) មេបញ្ជាកងរាជអាវុធហត្ថខេត្ត បានដាក់កម្លាំងកងរាជអាវុធបានចុះប្រតិបត្តិការលោមព័ទ្ធផ្ទះមួយកន្លែង ស្ថិតនៅផ្លូវទំនប់បេតុង ក្នុងភូមិរាជានុកូល២ សង្កាត់ស្ទឹងត្រែង ក្រុងស្ទឹងត្រែង បានធ្វើការឃាត់ខ្លួនប្រធានការិយាល័យប្រឆាំងបទល្មើសគ្រឿងញៀនលោកវរសេនីយ៍ឯក (ចែម ផានិត) រួមនឹងអនុប្រធានការិយាល័យប្រឆាំងបទល្មើសគ្រឿងញៀនចំនួន២រូបទៀត យោងទៅតាមចម្លើយសារភាពរបស់ជនសង្ស័យលួចខ្សែភ្លើង និងប្រើប្រាស់គ្រឿងញៀន ដែលកម្លាំងអាវុធហត្ថបានឃាត់ខ្លួនកាលពីប៉ុន្មានថ្ងៃកន្លងទៅថ្មីៗនេះ៕
![](https://www.cnc.com.kh/news/c39a19290099efb70a1d1ab87c62af66.jpg)
![](https://www.cnc.com.kh/news/06bf5b05ce7c44f539cb5d084d8777de.jpg)
![](https://www.cnc.com.kh/news/a5d45b3d1abfc4e8c4395241aa78b21e.jpg)
![](https://www.cnc.com.kh/news/4311e86106c034c3a23063f3b3acb7b6.jpg)
![](https://www.cnc.com.kh/news/a41108e33521fc76959b62303b5d53d1.jpg)
![](https://www.cnc.com.kh/news/3423f7426626e7b2b482f3cbe55b33b0.jpg)
![](https://www.cnc.com.kh/news/668981090e4581437f56ccde855c8da1.jpg)
![](https://www.cnc.com.kh/news/ae2cfbb4e157142ed56fdcd02f70b9c4.jpg)
![](https://www.cnc.com.kh/news/975ec148e0fbea658d7188e8b3c1cb56.jpg)
![](https://www.cnc.com.kh/news/c7975352ed7abac1ea51f5b533b851b7.jpg)