ជនជាតិវៀតណាម ចំនួន២៨នាក់ ក្នុងនោះស្រី ៦នាក់ ត្រូវបានបណ្តេញចេញពីកម្ពុជា បន្ទាប់ពីពួកគេលួចស្នាក់នៅ និងធ្វើការខុសច្បាប់។ បើតាមអគ្គនាយកដ្ឋានអន្តោប្រវេសន៍ ពួកគេ ត្រូវបញ្ជូនចេញពីកម្ពុជា កាលពីថ្ងៃទី៩ ខែសីហា តាមប៉ុស្តិ៍នគរបាលច្រកទ្វារព្រំដែន អន្តរជាតិបាវិត ខេត្តស្វាយរៀង។
អគ្គនាយកដ្ឋានអន្តោប្រវេសន៍ បានបញ្ជាក់បទល្មើសរបស់ជនជាតិវៀតណាមទាំងនោះដូច្នេះ៖ «បណ្តេញជនជាតិវៀតណាមសរុបចំនួន ២៨នាក់ ស្រី៦នាក់ ពាក់ព័ន្ធករណីលួចស្នាក់នៅធ្វើការងារខុសច្បាប់ គ្មានលិខិតឆ្លងដែន អ្នកកាន់កាប់ល្បែងស៊ីសង និងអ្នកចាត់ចែងល្បែងស៊ីសង (ល្បែងអនឡាញ)។»។
ពាក់ព័ន្ធនឹងបទល្មើសល្បែងអនឡាញនេះដែរ ឯកឧត្តមអភិសន្តិបណ្ឌិត ស សុខា រដ្ឋមន្ត្រីក្រសួងមហាផ្ទៃ ធ្លាប់អះអាងថា កម្ពុជាប្រទេសរងគ្រោះ ពីទង្វើដែលជនបរទេស តែងតែយកកម្ពុជា ជាទីតាំងប្រព្រឹត្តបទល្មើស។ ដើម្បីការពារកេរ្ត៍ឈ្មោះរបស់កម្ពុជាលើឆាកអន្តរជាតិ។ ក្រសួងមហាផ្ទៃ បានបញ្ជាឱ្យអង្គភាពពាក់ព័ន្ធជាពិសេសអគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍ ចាត់វិធានការបង្ក្រាបបទល្មើសឆ្លងដែនគ្រប់ប្រភេទ បទល្មើសអន្តោប្រវេសន៍ និងឧក្រិដ្ឋកម្មឆ្លងដែននានា ឱ្យបានម៉ឹងម៉ាត់៕
