ភ្នំពេញ៖ សាលាដំបូងរាជធានីភ្នំពេញណែនាំឲ្យគណនីហ្វេសប៊ុក ឈ្មោះ ផែង វណ្ណៈ, Pheng Vannak News និង PVN News ក្នុងករណីដែលមិនយល់ ឬឆ្ងល់ ត្រូវធ្វើការសាកសួរព័ត៌មានពីអ្នកនាំពាក្យរបស់សាលាដំបូងរាជធានីភ្នំពេញ ឱ្យបានច្បាស់ជាមុនសិន មុននឹងធ្វើការសរសេរ និងបង្ហោះផ្សព្វផ្សាយទៅ ក្នុងគណនីហ្វេសប៊ុករបស់ខ្លួន។ តុលាការភ្នំពេញក៏បានព្រមានថា ការផ្សព្វផ្សាយដែលបង្កប់នូវចេតនាទុច្ចរិត ញុះញង់ ធ្វើឱ្យចលាចលក្នុងសង្គម និងការផ្សព្វផ្សាយដែលមានចេតនាធ្វើឱ្យប៉ះពាល់ដល់សេចក្ដីសម្រេចតុលាការ ជាបទល្មើសព្រហ្មទណ្ឌ ត្រូវទទួលខុសត្រូវចំពោះមុខច្បាប់ជាធរមាន។
តុលាការរាជធានីព្រមានដូច្នេះ ដោយហេតុថា គណនីហ្វេសប៊ុករបស់លោក ផែង វណ្ណៈទាំង៣ខាងលើ បានផ្សព្វផ្សាយព័ត៌មានពាក់ព័ន្ធនឹងការដោះលែងជនជាតិចិនម្នាក់ចេញពីពន្ធនាគារ បន្ទាប់ពីបុគ្គលនោះអនុវត្តទោសទណ្ឌចប់សព្វគ្រប់រយៈពេល២ឆ្នាំ និងពិន័យជាប្រាក់ ៤លានរៀល ពាក់ព័ន្ធនឹងបទល្មើសជួញដោយខុសច្បាប់នូវសារធាតុញៀន។
យោងតាមសេចក្ដីប្រកាសរបស់សាលាដំបូងរាជធានីភ្នំពេញ ទំព័រហ្វេសប៊ុកទាំង៣ របស់លោក ផែង វណ្ណៈ បានផ្សព្វផ្សាយថា « ១. បទល្មើសជួញដូរដោយខុសច្បាប់នូវសារធាតុ ញៀន ជាប់គុកតែ ២ ឆ្នាំ ពិន័យ៤លានរៀល ម្ដេចបានទោសស្រាលម៉្លេះ? សុំទោសខ្ញុំគ្រាន់តែឆ្ងល់ទេ មិនហ៊ាន បរិយាយអ្វីទេ, ២.ថ្ងៃច័ន្ទស្អែកពេលល្ងាចមកពីខេត្តវិញ ចាំលម្អិតព័ត៌មានអំពីគ្រឿងញៀន ២១គីឡូក្រាម ចៅក្រមកាត់ទោស ២ឆ្នាំ ពិន័យ ៤លានរៀល! ព្រហើនណាស់ និង ៣.សាហាវហួសថ្លែងគ្រឿងញៀន២១គីឡូ ក្រាមជាប់ គុក២ឆ្នាំ »។
ពាក់ព័ន្ធនឹងករណីចេញផ្សាយដោយភាន់ច្រឡំ ឬមិនមានព័ត៌មានគ្រប់គ្រាន់នេះ តុលាការរាជធានីភ្នំពេញបំភ្លឺថា ករណីជនជាតិចិនដែលអនុវត្តទោសចប់ និងត្រូវបានដោះលែងឲ្យមានសេរីភាពវិញ ជាករណីផ្សេងពីករណីមួយទៀត ដែលជនល្មើសជនជាតិចិនដែរ ប៉ុន្តែជាបទល្មើសរក្សាទុក និងដឹកជញ្ជូនដោយខុសច្បាប់នូវសារធាតុញៀន ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០២០ រហូតដល់ថ្ងៃទី៣ ខែធ្នូ ឆ្នាំ២០២២ ហើយតុលាការសម្រេចដាក់ពន្ធនាគារជនជាតិចិននោះ អស់មួយជីវិត និងពិន័យជាប្រាក់ ៨០ ០០០ ០០០ (ប៉ែតសិបលាន) រៀល។
បើតាមរបាយការណ៍នគរបាលនៃមន្ទីរប្រឆាំងគ្រឿងញៀន បង្ហាញថា បន្ទាប់ពីឃាត់ខ្លួននិងសួរនាំលើជនជាតិចិនដែលត្រូវជាប់គុក២ឆ្នាំ បានតម្រុយហើយ ទើបសមត្ថកិច្ចបន្តឆែកឆេរលំនៅរបស់ជនជាតិចិនម្នាក់ទៀត ដែលត្រូវផ្ដន្ទាទោសដាក់ពន្ធនាគារអស់មួយជីវិត និងបានរកឃើញសារធាតុញៀនជាង២១គីឡូក្រាម៕
