ស្ទឹងត្រែង ៖ ជនបរទេសចំនួន៤នាក់ ត្រូវបានចាប់ខ្លួនដោយកម្លាំងនគរបាលបើកប្រតិបត្តិការបង្ក្រាបលើករណីគ្រឿងញៀនឆ្លងដែនទ្រង់ទ្រាយធំមួយ ។ តាមប្រភពព័ត៌មានអោយដឹងថា ក្នុងប្រតិបត្តិការនេះ កម្លាំងសមត្ថកិច្ចបានតាមដានក្រុមឧក្រិដ្ឋជនយ៉ាងស្វិតស្វាញ ដោយមានការសហការពីកម្លាំងថ្នាក់ជាតិ និងកម្លាំងនគរបាលចំនួន២ខេត្ត គឺខេត្តព្រះវិហារនិងខេត្តស្ទឹងត្រែង រហូតឈានដល់ការបង្ក្រាបបានដោយជោគជ័យចាប់យកវត្ថុតាង និងក្រុមឧក្រិដ្ឋជនជនបរទេសចំនួន៤នាក់។
ប្រភពដដែលបន្ត ការបង្ក្រាបនោះកម្លាំងសមត្ថកិច្ចបានធ្វើឡើងតាមដំណាក់កាលនីមួយៗ ជំហានដំបូងនៅថ្ងៃទី២០ ខែវិច្ឆិកា ឆ្នាំ២០២៤ វេលាម៉ោង២១និង១០នាទី កម្លាំងប្រចាំការនៃអនុគណៈកម្មការ បង្ការ ទប់ស្កាត់ និងបង្ក្រាបគ្រឿងញៀនតាមបណ្តាខេត្តជាប់ព្រំដែនភាគឦសាន សហការជាមួយលោកវរសេនីយ៍ឯក វ័រ វុទ្ធា នាយករងមន្ទីរប្រឆាំងបទល្មើសគ្រឿងញៀន(ក៧) បានដឹកនាំកម្លាំងមន្ទីរប្រឆាំងបទល្មើសគ្រឿងញៀនដោយមានការសម្របសម្រួលពីលោក ទី សុវិនថាល់ ព្រះរាជអាជ្ញានៃអយ្យកាអមសាលាដំបូងខេត្តព្រះវិហារបានបញ្ជាឲ្យលោក ស្រេងវុទ្ធា ព្រះរាជអាជ្ញារងនៃអយ្យការអមសាលាដំបូងខេត្តព្រះវិហារ ដឹកនាំផ្ទាល់សហការសម្របសម្រួលជាមួយ ឯកឧត្តម កែវ សុធា ព្រះរាជអាជ្ញានៃអយ្យកាអមសាលាដំបូងខេត្តស្ទឹងត្រែងចូលរួមសហការដោយលោកស្នងការរងទទួលផែនការងារប្រឆាំងគ្រឿងញៀន នៃស្នងការដ្ឋាននគរបាលខេត្តព្រះវិហារ និងស្នងការរងទទួលផែនការងារប្រឆាំងគ្រឿងញៀនខេត្តស្ទឹងត្រែង កម្លាំងទំនាក់ទំនងព្រំដែន(BLO)កំពង់ស្រឡៅ, កម្លាំងវរៈនគរបាលការពារព្រំដែនប្រចាំការនៅកំពង់ស្រឡៅបានចុះបង្ក្រាបជាក់ស្តែងមាន០៣គោលដៅ ។
ប្រភពបន្តថា គោលដៅទី១៖ធ្វើឡើងនៅថ្ងៃទី២០ ខែវិច្ឆិកា ឆ្នាំ២០២៤ វេលាម៉ោង២១និង១០នាទី ដោយយោងតាមព័ត៌មានរបស់ភ្នាក់ងារសម្ងាត់បានរាយការណ៍ថា មានមុខសញ្ញាបាននឹងកំពុងដឹកជញ្ជូន គ្រឿងញៀនចំនួន៣០បេ ។ ប្រភពបង្ហើបថា សារធាតុសង្ស័យជាគ្រឿងញៀនចំនួន៣០បេនោះ អាចមានទម្ងន់ប្រហែលជា៦០០គីឡូក្រាមដាក់តាមរថយន្តនៅចំណុចខ្ទមអ្នកតា ស្ថិតនៅភូមិកំពង់ពោធិ៍ ឃុំកំពង់ស្រឡៅមួយ ស្រុកឆែប ខេត្តព្រះវិហារ យកទៅប្រគល់អោយមុខសញ្ញាចាំទទួលនៅ ភូមិសាស្ត្រខេត្តស្ទឹងត្រែង បន្ទាប់មក កម្លាំងសមត្ថកិច្ចជំនាញក៏បានសុំគោលការណ៍ពីថ្នាក់ដឹកនាំបន្តទៅខេត្តស្ទឹងត្រែង ដើម្បីបង្ក្រាប ។
គោលដៅទី២៖ ឈានចូលថ្ងៃទី២១ ខែវិច្ឆិកា ឆ្នាំ២០២៤ វេលាម៉ោង០២និង៣០នាទី កម្លាំងមន្ទីរប្រឆាំងគ្រឿងញៀន សហការជាមួយកម្លាំងផែនការងារប្រឆាំងគ្រឿងញៀននៃស្នងការដ្ឋាននគរបាលខេត្តព្រះវិហារ, កម្លាំងផែនការងារប្រឆាំងគ្រឿងញៀននៃស្នងការដ្ឋាននគរបាលខេត្តស្ទឹងត្រែង ដោយលេចមុខសញ្ញាទៅធ្វើការប្រគល់-ទទួល នៅចំណុចមុខស្ថានីប្រេងឥន្ទនៈតេលាមេគង្គតាមបណ្តោយផ្លូវជាតិលេខ៩ ស្ថិតក្នុងភូមិអូរត្រែល ឃុំថាឡាបរីវ៉ាត់ ស្រុកថាឡាបរីវ៉ាត់ ខេត្តស្ទឹងត្រែង ភ្លាមនោះសមត្ថកិច្ចយើងបានធ្វើការបង្ក្រាបជាក់ស្តែង ឃាត់ខ្លួនជនសង្ស័យចំនួន០២នាក់ ១.ឈ្មោះ ខាំ ឡេហឺ (KHAM LEE HER) ភេទប្រុស អាយុ២៧ឆ្នាំ ជនជាតិឡាវ កាន់លិខិតឆ្លងដែនលេខ P3138543។ទី២.ឈ្មោះ សាឡាំ ផុន ភេទប្រុស អាយុ៣៣ឆ្នាំ ជនជាតិថៃ ព្រមទាំងចាប់យកវត្ថុសង្ស័យជាសារធាតុញៀនចំនួន៣០ប៉េ និង រថយន្តចំនួន០១គ្រឿង ម៉ាក TOYTA Hilux Rally ពណ៌សពាក់ស្លាកលេខ 2AT-5389 ទូរស័ព្ទចំនួន០២គ្រឿងលិខិតឆ្លងដែន០១ច្បាប់ ។
គោលដៅទី៣៖ ថ្ងៃខែឆ្នាំដដែល វេលាម៉ោង០៣និង៤០នាទី នៅចំណុចផ្ទះសំណាក់មួយកន្លែង ស្ថិតនៅភូមិរាជានគរ សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង សមត្ថកិច្ចបានបន្តឃាត់ខ្លួនជនសង្ស័យ០២នាក់ បន្ថែម១.ឈ្មោះ MR. JAROEN SAE LAO ភេទប្រុស អាយុ៣២ឆ្នាំ ជនជាតិថៃ កាន់លិខិតឆ្លងដែនលេខ AC7483332 ២.ឈ្មោះ អៀ ថរ (IA THO) ភេទស្រី អាយុ២៧ឆ្នាំ ជនជាតិឡាវ កាន់លិខិតឆ្លងដែនលេខ P2969632 រថយន្ត០១គ្រឿង ម៉ាក TOYOTA Hilux Revo ពណ៌ស ពាក់ស្លាកលេខ ភ្នំពេញ 2AS-6505 ទូរស័ព្ទដៃ០២គ្រឿងលិខិតឆ្លងដែន០២ច្បាប់ ។
បច្ចុប្បន្ន ជនសង្ស័យចំនួន០៤នាក់ ជនជាតិថៃ០២នាក់ ជនជាតិឡាវ០២នាក់ និងវត្ថុតាងខាងលើ បានបញ្ជូនទៅកាន់មន្ទីរប្រឆាំងបទល្មើសគ្រឿងញៀន ដើម្បីបន្តនីតិវិធី៕
